Hoxe tráiovos unha receita superdoada de facer que non vos podedes perder! Desde a cooperativa Condado Paranta, animáronme a participar no seu concurso de receitas de requeixo e, malia que non gañei (cómpre dicir que o resto de participantes fixeron uns pratos espectaculares), quixen compartir esta sobremesa con vós.
Velaquí tedes a videoreceita!
Ingredientes
- 3 ovos
- 500 g de requeixo
- 200 ml de nata
- 3 dátiles
- 60 g de fariña
- Amorodos para decorar
Preparación
- Antes de máis, cómpre poñermos a quencer o forno a 180ºC.
- Para facermos o amoado da nosa torta, mesturamos todos os ingredientes con axuda dun batedor até que non quede ningún bolboroto.
- Cando teñamos o amoado listo, vertémolo nun molde de 28cm e enfornamos a nosa torta durante 45 minutos. Cando a estea dourada, sacámola do forno e agardamos a que arrefríe un pouco antes de sacala do molde.
- Decoramos con amorodos ou coa froita que máis nos guste e listo. Bo proveito!
🍊 Se fas esta receita, non esquezas etiquetarnos e partillala co cancelo #medialaranxa !!
